ສາຍເຊລຳເພົາ

edit @ 22 Oct 2009 11:08:33 by saixelamphao

edit @ 22 Oct 2009 11:08:51 by saixelamphao

edit @ 22 Oct 2009 11:09:15 by saixelamphao

edit @ 28 Sep 2009 08:59:11 by saixelamphao

- ວັນນັ້ນ ໄປເບິ່ງຄົນປ່ວຍໄຂ້ ເຂົາຮຽກວ່າຄົນໂຊ
ນອນບໍ່ຕິງປ່ວຍໜັກ ຮຽກວ່າໂຊທັງນັ້ນ
ບໍ່ວ່າລາວທາງໃຕ້ ລາວທາງໃດກໍຕາມຊ່າງ
ໄທໃຫຍ່ລາວເຂີນຜ່ອງລື້ ເຂົາກໍເວົ້າວ່າໂຊ

- ວັນນັ້ນຄົນໂຊ ນອນຢູ່ໃກ້ຕູ້ໂຊໃຫຍ່ໃນເຮືອນ
ລູກຫຼານໄດ້ເອົາຕຽງໂຊ ມາໃຫ້ນອນສະບາຍແທ້
ຕັ່ງນັ່ງສຳລັບຄົນໄປເຝົ້າ ຢ້ຽມຢາມຍາມໄຂ້ປ່ວຍ
ເຂົາກໍມີມາກລົ້ນ ໂຕ໊ະຕັ່ງພ້ອມເຕັມແຕ່ໂຊ

- ຄົນໂຊບໍ່ຄິດໂກ້ ເຖິງນອນຢູ່ຕຽງໂຊ ກໍຕາມທ້ອນ
ຂ້າງຕູ້ໂຊທັງໂຕ໊ະໂຊ ຕັ່ງນັ່ງໂຊທັງນັ້ນ
ຄວາມເຈັບມາແຝງຝັ້ນ ບໍ່ກະສັນຈັກສະໜ່ອຍ
ຄວາມເຈັບໂຊມາບີບຄັ້ນ ຂອງໂຊນັ້ນເປົ່າຄຸນ ທ່ານເອີຍ.

ມະໂນໃນແນບເນື້ອ                ພາຍພາກກາຍຍາເຮົານີ້

ຈັກວ່າມັນຢູ່ໃສ                     ບໍ່ມີໃຜຮູ້

ຫາກວ່າຫົວໃນນັ້ນ                 ຫາເຫັນຊອກງ່າຍ

ວິທະຍາສາດຮັບຮູ້                 ເຫັນແລ້ວໜ່ວຍໃຈ

          ຄືວ່າກາຍກອດກ້ຽວ     ຈະຢືນຢູ່ຄົງທົນ

ຫົວໃຈທຳງານໜັກ                 ຄວບຄຸມກາຍສ້ຽງ

ຫາກວ່າຫົວໃຈເຈົ້າ                  ສູນເສັຍພິການພາບ

ກາຍຍ່ອມເສັຍ ແລະສ້ຽງ         ໝົດສິ້ນຊື່ສຽງ

          ໃຈນີ້ແມ່ນຮູບເນື້ອ         ມອງເບິ່ງດ້ວຍຕາ

ແຕ່ວ່າຫະໄທນຶກ                    ເຈດຈິດຄົນນັ້ນ

ມັນເນັ່ງເນົານອນສິ້ງ                ສິງໃສໃຜຮູ້ໄດ້ແນ່

ບໍ່ມີຮັບຮູ້                              ເຫັນເບື້ອງເຈຕະໄນ ໄດ້ເລີຍ

          ພຣະພຸດຕັກສັ່ງໄວ້       ມວນໝູ່ກິດມະນຸດ

ທັງວິຊາການສູງ                     ວຽກງານການລ້ວນ

ຮູບປະທຳນຳແຈ້ງ                   ນາມມະທຳອະຮູບ

ເວົ້າຈາທັງນຶກນ້ອມ                  ກະທຳພ້ອມສ່ວນກາຍ

          ສັບພະພູມພາກພື້ນ       ພຽງພົບມານຸດສາ

ກິດຈະການງານສັງ                  ລ້ວນແຕ່ໃຈບັນຊາສ້ຽງ

ອັນວ່າທັມພູມພ້ອມ                 ການກະທຳຜົນພາຍພາກ ມະນຸດນັ້ນ

ເກີດແຕ່ໃຈເຈດແຈ້ງ                  ກະທຳລ້ວນເລີດປະມານ

          ພຸດທະພາສິດບອກແຈ້ງ   ມະໂນເຈດໃຈຈິດ ທ່ານເອີຍ

ມະໂນປຸພພັງຄະມາ ທັມມານັ້ນ    ທັມທັງຫຼາຍໃນສາກົນໂລກ

ມີຫົວໃຈເປັນທີ່ຕັ້ງ                    ບັນຊາການເປັນໃຫຍ່

ເປັນປະທານນັ່ງຊີ້                    ບັນຊາວຽກເຫດການ

          ວຽກງານຫຼາຍຫຼາກລົ້ນ   ມວນມາກອະນັນນັບ

ຈະສຳເລັດລົງຄົບ                     ແລ້ວໝົດສຸດສ້ຽງ

ມະໂນເສດຖາ ມະໂນມະຍາພ້ອມ  ບັນຊາການຊີ້ຊອບ

ເຮັດໃຫ້ວຽກວາດໄວ້                  ສຳເລັດແທ້ດັ່ງຫວັງ

          ດັ່ງນັ້ນ ເພີ່ນຈຶ່ງເວົ້າ          ສານຕໍ່ອະທິບາຍ

ການກະທຳ, ວາຈາຈິດ                ຄິດນຳແນວນິ້ງ

ຫາກວ່າທຳການນັ້ນ                   ແນວດີບຸນກໍຕອບ

ຫາກວ່າຊົ່ວເປັນທີ່ຕັ້ງ                  ບາບກໍຕື້ຕອບສະໜອງ

          ທ່ານຈຶ່ງທຽບໃຫ້ຮູ້           ເຫັນເຫດເຫັນປັດໄຈ

ເຫັນຄຸນທຳທາງປະພືດ               ກ໋ຽວກັນບໍ່ມີເວັ້ນ

ເໝືອນກົບງົວທຽບແລ້ວ               ຍັງກວຽນລໍ້ໃຫຍ່

ງົວເດີນໄປໃສກວຽນກໍໄປຕາມນັ້ນ   ເໝືອນແທ້ດັ່ງກັນ

          ໃຈຈຄິດແນວໄດ້ເສື່ອງໄວ້    ໃນທີ່ຊວງເລີກ

ໃຜບໍ່ເຫັນນຳຄັກ                        ເພາະຢູ່ໃນໃຈເຈົ້າ

ແຕ່ວ່າການກະທຳທັງເວົ້າ              ມັນແນໃຈໃຫ້ຄົນອ່ານ

ເຈຕະນາບອກເລື້ອງ                    ເຫັນຮູ້ຫ່ອມໃຈ ແທ້ແລ້ວ                                               

edit @ 17 Sep 2009 10:27:06 by saixelamphao

- ສ້າງຄວາມດີ ສ້າງທີ່ໃດ ກໍຍ່ອມໄດ້
ສ້າງຢູ່ໃກ້ ສ້າງຢູ່ໄກ ໄດ້ທຸກຫົນ
ວ່າແຕ່ສ້າງ ສິ່ງດີໄວ້ ໃນເມືອງຄົນ
ຄວາມສຸກລົ້ນ ດ້ວຍຜົນດີ ທະວີຄູນ

- ຄັນສ້າງດີ ຍ່ອມໄດ້ດີ ດີຕ້ອງຕອບ
ໃຜກໍຊອບ ໃນຄວາມດີ ທີ່ເຫັນຜົນ
ສ້າງຄວາມດີ ບໍ່ມີຊົ່ວ ມາເຈືອປົນ
ດີບັນດົນ ໃຫ້ທຸກຄົນ ໄດ້ດີຕາມ

- ອັນຄວາມດີ ຄິດວ່າດີ ທຳໄປເຖີດ
ຢ່າຕະເຫຼີດ ສ້າງຄວາມດີ ດີແອບແຝງ
ສ້າງຄວາມດີ ແຕ່ເອົາຊົ່ວ ມາຈຳແລງ
ຍ່ອມພິກແພງ ແປງຄວາມດີ ທຸກຕິດຕາມ

- ສ້າງຄວາມດີ ສ້າງທີ່ໃດ ສ້າງໄປເກີດ
ໃຫ້ມັນເກີດ ເປີດເສັ້ນທາງ ຢ່າງສົດໃສ
ສ້າງຄວາມດີ ເອົາດີໄວ້ ອາທອນໃຈ
ຍ່ອມສຸກໄດ້ ຜົນຂອງດີ ນິດນິຣັນ
---
ສາຍເຊລຳເພົາ
ວັນທີ ໐໗/໐໙/໐໙
ດ້ວຍຄວາມຮັກແພງ ແລະນັບຖືກຍິ່ງ

edit @ 7 Sep 2009 17:07:28 by saixelamphao

ເພງຈຳປາມາລາລາວ
- ດວງດອກຈຳປາ------------------------ມາລາຫຼາກສີ
ເນົາຢູ່ດິນແດນປະຖະພີ--------------------ຂອງລາວລ້ານຊ້າງ
ລາວພາກພູມໃຈຈຳປາວິໄລ----------------ຊາດລາວມຸ້ງຫວັງ
ເຖິງແມ່ຂອງຈະ ແຍກສອງ​ຝັ່ງ--------------ກໍລົ້ນລັ່ງດ້ວຍມີດໄມຕຣີ

- ຊາດວິໄລ------------------------------ສົດໄສດ້ວຍປະເພນີ
ວັດທະນະທັມຮີດສິບສອງຄອງສີບສີ່--------ບົ່ງບອກຊີ້ຊາດລາວຈະເລີນ
ພາສາປາກເວົ້າ---------------------------ໂຮມເຕົ້າຊາດລາວສັນເສີນ
ເຊື້ອຊາດລາວບໍ່ແຍກທາງເດີນ-------------ແມ່ນ້ຳຂອງຈະເລີນຄູ່ໂລກວັດທະນາ

- ດວງດອກຈຳປາ------------------------ມີຄຸ່ນຄ່າຕໍ່ຫົວໃຈລາວ
ມີດວງດອກສີສັນຫຼາກພັນພົງສາ------------ເໝືອນລາວເຮົານີ້ໜາ ມີວົງສາຫຼາຍເຊື້ອຊາດພັນ
ໄທເໜືອໄທໃຕ້ໄທໃດໆ-------------------ກໍລາວດຽວກັນ
ຊາດພູມສີສັນບໍ່ໄດ້ແບ່ງກັນ----------------ເວົ້າຈາພາສາລາວຄົງໝັ້ນ ລາວທັງນັ້ນຢ່າໄດ້ລືມເລີຍ

- ດວງດອກຈຳປາ------------------------ມາລາລາວນີ້
ສ້າງສັນສັກສີ-----------------------------ໃຫ້ມີຄຸນຄ່າ
ຮ່ວມສ້າງຮ່ວມພັດທະນາ-------------------ຮ່ວມປະກາດສັກດາ
ໃຫ້ລາວຄູ່ຟ້າ------------------------------ຊົ່ວໂລກວັດທະນານິລັນການ

-------------------------------------------ແຕ່ງເວລາ ໐໙:໒໐ ໂມງ ຈົບເວລາ ໐໙:໓໕ ໂມງ ຂອງວັນທີ ໒໖/໐໖/໒໐໐໙

edit @ 6 Sep 2009 10:55:03 by saixelamphao

ອັນກົງກວຽນ---------ຄືກົງກັມ-----ພຣະທ່ານວ່າ
ເດີນຊ້າຊ້າ-----------ໄປເລື້ອຍໆ--ບໍ່ລໍໃຜ
ຫາກມະນຸດ----------ຮູ້ເທົ່າທັນ---ຢູ່ທີ່ໃຈ
ຍອມຈັກໄດ້----------ຣາງວັນ-----ຊີວິດຈິງ

ອັນກົງກວຽນ---------ໜູນວຽນໄປ--ບໍ່ຢຸດຢັ້ງ
ນັບໜຶ່ງຕັ້ງ-----------ໂຄ້ງຕ່າວ----ກັບຄືນຄົບ
ຫາກມະນຸດ----------ຮູ້ຈັກທາງ---ບ່ອນບົນຈົບ
ຍ່ອມຈັກພົບ----------ຄວາມມຸ້ງຫວັງ--ດັ່ງໃຈປອງ

ກົງກວຽນນັ້ນ---------ທ່ານທຽບໄດ້--ກັບການເກີດ
ແລ້ວກໍເປີດ----------ເສັ້ນທາງ------ຢ່າງມີຈຸດ
ເຖິງເວລາ------------ທີ່ເດີນທາງ----ໂດຍສົມມຸດ
ສັດມະນຸດ------------ຕ້ອງເສກເຊັ່ນ-ເປັນດັ່ງດຽວ

ຄວາມຮັກນັ້ນ---------ປຽບໄດ້-------ກັບສິ່ງນີ້
ພຣະທັມຊີ້------------ໃຫ້ເຫັນ------ເປັນສັກຂີ
ຫາກມະນຸດ-----------ຮູ້ເຫດເຣື່ອງ--ແຫ່ງວິຖີ
ສ້າງຊີວີ--------------ໄປຕາມເກນ---ຍ່ອມເຫັນທັມ

edit @ 6 Sep 2009 09:14:01 by saixelamphao

edit @ 6 Sep 2009 09:14:58 by saixelamphao

edit @ 7 Sep 2009 10:48:42 by saixelamphao

edit @ 7 Sep 2009 10:49:09 by saixelamphao